الكسكي/الطعام/او البربوشة طبق جزائري معروف في كل بيت و انا لازم كل جمعة يكون حاضر
علابالي بلي ماكانش لي مايعرفش يطيبو
البربوشة او الطعام او الكسكسي كل منطقة كيفاه تسميه ،فيه زوج مراحل
١- #تحضير_المرق:
في كوكوت نحطو بطلة مرحية مع سنات ثوم طراف جاج او لحم (اكيد باللحم احسن) فلفل احمر حار و حلو لفاح شوية فلفل اكحل ملح زوج ملاعق كبار طماطم مصبرة زوج ملاعق زيت و نص كاس ماء و نقلي الكل مليييييح كي نشوفوها نشفت نزيدو كاس ماء و نخليوها تتقلى اكثر
نروحو نقشرو الخضر نتناعنا و نغسلوها (جزر لفت بطاطا جريوات ) بعد انا نحب نطيب الخضر مع الجاج لانو كمية الخضر و الجاج قليلة نتاع عايلة فقط
بالنسبة للخضر نخير الحبات الصغار و مانقسمهمش نلوحهم مجمولين)
نلوح الخضر لي تدي وقت كبير في الطياب كيما اللفت و الجزر و نمرق بلتر و نصف ماء و نقفل الكوكوت ربع ساعة نحلها نلوح البطاطا و الجريوات  و نزيد نقفل الكوكت عشر دقايق بالكثير
نحي الجاج بجيه و خليه يقطر و من بعد ادهنيه بشوي زبدة و ذري شوي ملح و فلفل اكحل و حمريه في الفور من فوق فقط. (هاد المرحلة اختيارية )
نصفي المرق نتاعي
نرجعو لاكوكوت و نرمي كمشة حمص طايب من قبل و نخليه يهز الغلية مليح و اذا الحمص نتاعي مشمخ برك و ماش طايب نلوحوه مع الاول
٢- #تحضير_البربوشة:
انا نستعمل #عمر_بن_عمر  كسكس #متوسط يجي احسن بكثييييير من. #الرقيق انا النوعية الرقيقة ندير بيها المسفوف
انا استعملت نص شكارة زدتلها فنجان زيت و خلطت مليح
سكبت عليها كمية مليح من الماء و حركت بسرعة و قطرتها و خليتها تنشف
بعد مانشفت حليتها بين يديا باش نتخلص من التكتلات حطيها في كسكاس و خليها تفور ملييييح نحيها و زيديلها كاس ماء و ملح و خليها تتشرب من بعد حليها بين يديك و خليها تبرد و رجعيها تفور
بعد ماتفور نحيها من الكسكاس و زيديلها كاس ماء و خليها تتشرب و من بعد حليها بين يديك و كي تبرد رجعيها للكسكاس و خليها تفور التفويرة الاخيرة
كي تفور نحيها من الكسكاس و حليها بين يديك و صمغيها بشوي زبدة او مارغرين او سمن بوقال
قدمي الكسكس مزين بالخضر و الحمص و سقيه بالمرق
تقدري تقلي الخضر في مقلاة فيه شوي زيت او زبدة رايح يعطيها لون روعة هي و الجاج